Tim qora osmonning oqardi yarmi,
Yulduzlar singidi, izi qolmadi.
Tanish daqiqalar, lahzalar seni
Eslashimga sabab bo‘la olmadi.
Olis qit'alarga cho‘zilgan yo‘llar,
Yillar xayolimdan o‘tmaydi bu kun.
Ayt menga, sershovqin, sovuq dunyoda
Nima eslamoqqa arzishi mumkin?
Tuproqday sochilgan qismatlarnimi,
Balki ilk odamzot bo‘lganin paydo?..
Dunyoda sof va samimiy tuyg'ular juda ko'p. Ammo ular orasida bir tuyg'u ham borki, uning nomini eshitgan zahoti har bir inson qalbi shamolda titragan yaproq kabi titrab ketadi. Xayolot dunyosi uni olis-olis xotiralar qo'yniga yetaklab borar ekan, dunyo tashvishlaridan toliqqan ko'ngil bir nafas ana shu his lazzatidan bahramand bo'ladi. Bu tuyg'u birinchi muhabbatdir. Mazkur she'r mutolaasi sizga ana shunday huzurbaxsh onlarni hadya etishiga ishonamiz.
