Sahifa yuklanmoqda . . .
Vatan, vatan der edilar, na der erdim bilmay ani,
Endi bilsam Vatan erkon bu tanlar(n)ing shirin joni,
Bir jon emas, ey suyguli, tomirlaring qoni Vatan,
Sensan, bale, bilganlara jonlarni jononi Vatan!
Sensan ekan bizlara chin tug‘mish bir munglig‘ ano,
Boqg‘ung tirik bo‘lsak, agar o‘lsok quchog‘ingda yano.
Bir jon emas, ey suyguli, tomirlaring qoni Vatan,
Sensan, bale, bilganlara jonlarni jononi Vatan!
Ko‘zlarmi ko‘r bo‘lgan uchun hech tanimas bo‘lduk sani,
Og‘rindi ko‘nglung, yuzaga og‘lo siring chiqsin qani!
Bir jon emas, ey suyguli, tomirlaring qoni Vatan,
Sensan, bale, bilganlara jonlarni jononi Vatan!
Essiz, essiz tug‘gonlaring, ko‘z yumub o‘q otub sani,
Bog‘lab qo‘ling boyonlara ne oldilar sotub sani,
Bir jon emas, ey suyguli, tomirlaring qoni Vatan,
Sensan, bale, bilganlara jonlarni jononi Vatan!
San onai zor ekanda, achingoning bor ekanda,
O‘lmay laxta qonlar to‘kub xor bo‘lub yurar ekanda.
Bir jon emas, ey suyguli, tomirlaring qoni Vatan,
Sensan, bale, bilganlara jonlarni jononi Vatan!
Biluvchilar qo‘l tutmadi, bizga sani tonutmadi,
Bilmam nelarga aldanub tangri buyruqin tutmadi.
Bir jon emas, ey suyguli, tomirlaring qoni Vatan,
Sensan, bale, bilganlara jonlarni jononi Vatan!
Bilimsizlar anglashmadi, oh-u voying tinglashmadi,
Bilguvchilar burchi ekan o‘ng‘aylamoq, o‘nglashmadi.
Bir jon emas, ey suyguli, tomirlaring qoni Vatan,
Sensan, bale, bilganlara jonlarni jononi Vatan!
Nihon yig‘lab qon yutunur, kechmog‘lig‘ingni o‘tunur,
Mundin buyon o‘g‘lonlaring chandon tonurga tutunur,
Bir jon emas, ey suyguli, tomirlaring qoni Vatan,
Sensan, bale, bilganlara jonlarni jononi Vatan!
(1889-1929) O’tgan asr boshida o’z she’riyati, dramatik va nasriy asarlari bilan o’zbek so’z san’atining yangicha taraqqiyotiga ulkan hissa qo’shgan Hamza ayni choqda o’zbek maorifi hamda teatr madaniyati tarixining ham yorqin siymosidir. Nihoniy taxallusida bitgan devoni, «Milliy ashulalar uchun milliy she’rlar majmuasi» to’plamlari, darsliklari, sahna asarlari va faoliyatiga xos barcha samaralar yuksak g’oyaviy-ma’rifiy ahamiyatga ega.