Vatan haqida she'r

Opa, esingizda-ku,
("O, hanuz og‘riydi dil" )
Ochlikdan qorni shishgan
Qirq beshinchi mash’um yil.
Yetti yoshda edingiz
Sizga emasdi pinhon:
Urush — o‘lim, shodlik — xat,
Tiriklik-ku, aniq — non.
Opa, esingizda-ku,
Kelganda javzo oyi,
Sarg‘ayib dumbul tortdi
Bolg‘alining bug‘doyi.
Yuvoshgina qush kabi
Hayotning isin sezib,
Dala kezar edingiz,
Kaftingizda don ezib,
Siz aniq bilardingiz,
Tiriklikning ismi — non,
...Bosib ketdi dalani
Ot dupuri nogahon.
Kaftingizga jonsarak
Yashirdingiz boshoqni.
E voh, yer shuncha qattiq,
Osmon shuncha uzoqmi?!
Qanotingiz bo‘lsa ham.
Qayga uchardingiz, xo‘sh?
Ot kelar, chavandozning
Bir yengi hilpirar — bo‘sh...
Tanidingiz bu — rais,
Undan titraydi qishloq.
"Rais" desa jim qotar.
"Yig‘layotgan" qo‘g‘irchoq,
...Eslaysiz, magazinda,
Bo‘lgan edi "ur-yiqit".
"Yo‘q, yana quyasan", deb
Hayqirdi birqo‘l yigit.
U yig‘ladi go‘dakday...
"Shahid qolgan do‘stlarning
Qasosini albatta,
Olaman", deb bo‘zladi.
Boqilgan qo‘yday semiz,
Magazinchi Shoyimning
Yoqasiga yopishdi:

"Topdim, deya xoinni!"
Ertasi xotin-xalaj
Yig‘ildi — umummajlis.
Yigit o‘rindan turdi:
— Saylanglar, bo‘lay rais...
Saylashsa saylashar-da,
Odam kamu, rais mo‘l!
Mayli, yarab qoladi...—
Xotinlar ko‘tardi qo‘l.
Keyin rais hayqirdi:
"Agar kelguncha zafar,
Kim o‘zini ayasa,
Mana qamchi!.. Xotinlar!"
Nonning lazzatini-ku,
To‘lab bo‘lmas qamchisiz...
Boshingizni qo‘l bilan
Bekitib cho‘kdingiz til...
— Bu yurganing nimasi,
Oyoqyalang, boshyalang.
(Don to‘la kaftingizni
Siqdingiz qo‘rqib mahkam)
— Qani, qo‘lingda nima?
(Qo‘rquv, dahshat aralash
Kaftigizni ochdingiz —
Endi mumkin savalash).
Ko‘zingiz yoshsiz edi,
Jiddiy — tayyor xo‘rlikka.
Kim ham rahm qilardi
Sag‘ir qolgan sho‘rlikka.
Hamma butun tayoqlar
Yetim boshda sinadi...
Rais otidan tushib
Boshingizni siladi.
Ishonmasdan boqdingiz
Ko‘zlariga umidvor.
Hayrat ichra qotdingiz...
U yig‘lardi shashqator.
Yig‘lar edi... Qizimni
Ezmasin deb cho‘ng qayg‘u
Tunda sassiz ezilgan
Onangizga o‘xshab u.
Siz ham zor yig‘lab birdan
Osildingiz bo‘yniga...
Ot o‘ynatib u ketdi
Bug‘doyzorning qo‘ynidan.
Javzo. Bir erka shamol
Bug‘doyzorga urar to‘sh.
Ot yelar. Chavandozning
Bir yengi hilpirar — bo‘sh.
Opa, o‘shandan buyon
Vatan haqida suhbat
Qo‘zg‘alsa kirib kelar
Ko‘zingizga bir surat:
Javzo. Bir erka shamol
Bug‘doyzorga urar to‘sh.
Ot elar. Chavandozning
Bir yengi hilpirar — bo‘sh..
Opa, Vatan — ulug‘ dard!
Opa, Vatan bog‘ bo‘lsin!
She’rda suratin chizsam,
To‘rt muchasi sog‘ bo‘lsin!