Sahifa yuklanmoqda . . .


Hay-hay uyat

Hay-hay, uyat, jon o'lan,
Kelin keldi, yo'lni och,
Ne ko'z bilan ko'rayki,
Kelin yarim yalang'och.

Sharqning qizi bo'lganda, 
Bo'lib sharm-u hayosi,
Bunchalar ochiq-sochiq,
Bo'lmas edi libosi.

- Kelin qaydan? - so'radim,
Bitta kelinoyidan,
Kesatdi: - Shu qishloqning
"Parij" degan joyidan.

- Yo, tavba! O'zimizning
Qizimizmi bu hali?
Otabeklar, Kumushlar
Kiygan liboslar qani?

Ko'ylagi uzuq-yuluq,
Yelkalari yap-yalang,
Voy-o'lay! Qo'ltiqlari
Ko'rinyapti-ku, qarang.

Ayol kishi bo'lsam ham,
Junjikib ketti etim,
Ko'krak yarim ochilib,
Bo'b turibdi bir yutum.

Bu libosda qizlarni,
Ko'rgandim kinolarda,
Bo'lar edi g'arbdagi
Ko'ngilochar joylarda.

Yozilardi u joylar
Eshigiga hammasin:
"O'n oltiga to'lmagan
Bolakaylar kirmasin".

Yopiqqina bo'lmasmi
Axir, "siyna", degan joy
Hamma ko'rdi, kuyovga
Nima qoldi endi, voy?!

Yirtilib ketganmikin,
Yoki ochgan jo'rttaga?
Qaynotasi uyalib
Chiqib ketti ko'chaga.

O'g'lin so'kar ichida,
Qanday bo'g'ilmay tursin:
"Uni - u, buni - bu", deb
Topgan xotining qursin.

Badaniga qarasam,
Oriyatdan qaqshayman,
Xotinlar hammomida
O'tirganga o'xshayman.

Qaynona: "Yelkasini
Yoping!" deb imlayapti,
Yanga der: "Yopay desam,
Kelin unamayapti".

Qaynonasi darg'azab,
Ichida der: "To'y o'tsin,
Kuningni ko'rsataman,
Qiz bo'lmay beting qursin!"

Ro'molin uchin bilan,
Bekitvolib og'zini,
Kampirsholar uyalib
Chetga olar o'zini.

Namoyishga ochilgan,
Bo'yin, qo'ltiq, yanoqlar,
Ko'zi bilan "yeb qo'ysam",
Deb turipti bo'ydoqlar.

Qanday chidab tiripti,
Kuyov munchalar royish,
Kelinnnig ziynatlarin
Qilib qo'yib namoyish.

Kuyovga qaradim-u,
Orim keldi, bo'ldim lol,
O'tiribdilar "okam"
Tirjayvolib bemalol.

Shom bo'ldi, tugadi to'y,
Karnayning o'chdi uni,
Tamom bo'ldi, ming shukr,
"Ochiq yelkalar kuni".

Qasd qildim: to'y qilaman,
Qizim Osiyoxonga,
Sharqona to'yliboslar
Chiqqanida do'konga.


Online dars - zoom, google meet orqali


Yangi She'rlar Marhabo Karimova She'rlari Marhabo Karimova asarlari