Sahifa yuklanmoqda . . .
Taxtli ko‘ngil — faqir bo‘lgin, Baxtli ko‘ngil — haqir bo‘lgin, Bahordan kech — tahir bo‘lgin — O‘zing so‘ng bir chechak o‘stir. Tosh bo‘lmagin — oqib turgin, Goh-goh o‘zni yoqib turgin, Ko‘kka har dam boqib turgin — Umiddan bir pechak o‘stir. Rasmingga boq, ko‘pdir yolg‘on, Yarming — rahmon, yarming — shayton, El koridan tolmaydig‘on— Bilak o‘stir, bilak o‘stir. Bo‘lsin desang el qarindosh, Avval qilgin o‘zingni fosh, Beray desang yolg‘onga dosh — Tilak o‘stir, tilak o‘stir. Odamgamas, haqqa ishon, Sen kim bo‘lsang — shudir zamon. Ko‘ksingni buz, etgin vayron — Qaytadan bir yurak o‘stir.
O’zbekiston xalq shoiri (2000). ToshDUning jurnalistika fakultetini tugatgan (1972). Ilk kitobi — «Insonni tushunish» (1979). «Holat» (1979), «Oqibat» (1980), «Ko‘zgu» (1983), «Surat parchalari» (1985), «Dars» (1985), «Ikkinchi aprel» (1987), «Baxshiyona» (1989), «G’aroyib ajdarho» (1990), «Uyg‘onish azobi» (1991), «G’ussa» (1994), «Uzun tun» (1994), «Saylanma» (1995), «Kuz» (2001) kabi she’riy va «Jodu» (2003) nasriy to‘plamlari nashr etilgan. Dramalar ham yozgan («Bir qadam yo‘l». 1997; «Alpomishning kaytishi», 1998 va boshqa).