Sahifa yuklanmoqda . . .
Audio bu yerda yuklanmadi, iltimos ushbu aloqani bosing
Men Quyoshni sevsam, hech kim qarshi emas,
Man etmas gullarni ko'ksimga taqsam.
Tabiatni sevsam, tahqir etmas hech kim,
Ayb etmas, osmonga suqlanib boqsam.
Men qo'rqaman faqat sening sevgingdan,
Seni sevganimni arz etsam bir kun,
Ro'para bo'ladi ming xil to'g'anoq, avvalo
Sen o'zing kulishing mumkin.
Qolaversa, tahdid, qarg'ish yo tahqir
Yana mol-mulk, sun'iy tashvishlar,
Aqidalar, urflar rahna solar balki,
Balki, ta'qib qilar mish-mishlar.
G'ov bo'lishi mumkin qonun, istehzo,
Kimningdir nafrati, zaharhandasi.
O'zi o'ylab topgan shartlar chirmovug'in
Yorib chiqa olmas bandasi.
Bordi-yu sen tol bo'lsang yo bir dona gul,
Men nur bo'lsam yo tomchi shabnam.
Sevgimizni hech kim man etolmas edi.
Ammo, netong, afsuski, biz odam...
Ha, odammiz...Odam dili qat-qat:
Goho farishtadir, goho ajdaho.
Balki, shuning uchun qahr beadad,
Balki, shuning uchun sevgi bebaho.
Roman, qissa, hikoyalari va she’riyati o’zining falsafiy teranligi, yoqimli badiiy mavjlari bilan o’quvchini rom etadi. «Opa-singillar», «Tug’ilish», «Davr mening taqdirimda», «Chinor», «Amu», «Jar yoqasida chaqmoq», «Buxoroning jin ko’chalari» singari yirik nasriy asarlari elga manzur. Adib yangicha mazmuniy va shakliy izlanishlarining samaralari bilan ham o’zbek adabiyoti tarixida o’ziga xos iz qoldirdi.