Sahifa yuklanmoqda . . .
O’zbek Navoiyni o'qimay qo’ysa,
Oltin boshning kalla bo’lgani shudir.
Bedil qolib Demyan Bedniyni suysa,
Qora sochning malla bo’lgani shudir.
O’zbek Navoiyni o qimay qo’ysa,
Dod demoqqa palla bo’lgani shudir.
Ma’rifatdan ayru o’ynasa, kulsa,
Aza chog'i yalla bo’lgani shudir.
O’zbek Navoiyni o qimay qo’ysa,
Aldangani, alla bo’lgani shudir.
Yulg'ich aziz bo’lib, bilgich xor bo’lsa,
Paytavaning salla bo’lgani shudir.
El komil bo’lmasa, yurt emas ulug',
Beqadr mahalla bo’lgani shudir.
Qalb to’la nur xalqning rizqi ham to'lug',
Ombor to’la g'alla bo’lgani shudir.
O’zbek o’zligini anglasa bekam,
Uning «Barakalla» bo’lgani shudir.
Olamga Navoiy nasliman degan
Ovozi baralla bo’lgani shudir.
1971-2000
Hozirgi zamon o’zbek she’riyatining taniqli vakili. Aruz va barmoq vaznlarida yozgan asarlari birdek mashhur. Ijodining asosini lirik turning barcha janrlaridagi she’riyati, dostonlari, dramatik asarlari, I.V.Gyote, S.Yesenin, R.Hamzatov singari jahon adabiyoti namoyandalari she’riyatidan qilgan tarjimalari tashkil etadi.