Dashtda

Bu yerdan oh urib o‘tgan Go‘ro‘g‘li,

Bu yerdan ot surib o‘tgandir Namoz,

Bu yerga qismatning uchta zo‘r o‘g‘li

Piyoz ekyapmiz, piyoz!

«Qarg‘ish tekkan yer bu!» – degan Xudoyor.

Faqat oy tunlari chodirin tikkan,

Faqat biz – uch og‘a-ini har bahor

Piyoz ekkanimiz ekkan.

Tirik-chilik...

O‘zingizga ma’lum buyog‘i.

Rizqi ro‘z degani – titilgan to‘rva.

Do‘konda falon pul paxta yog‘i...

Piyoz bo‘lsa, qozonda sho‘rva.

Bu yerni suv o‘gay singil sanaydi

Shabada yurmaydi – tiladi tikan.

Men akamga, bolam qo‘lga qaraydi...

Piyoz ekkanimiz ekkan.

Bu yerdan ot surib o‘tmaydi Namoz...

1987