Sahifa yuklanmoqda . . .
Yana orzularim eladi samo!
Osmon bisotini to‘kdi silkinib.
Yana oppoq qorga belandi dunyo,
Oftob bulutlarga oldi bekinib.
Daraxtning shoxiga bog‘lagan xayol
Bir sening ko‘zlaring singari bandi.
Tunlarni qo‘ynida o‘ynagan shamol
Bir mening ko‘nglimga o‘xshagan daydi.
Billur sadaflarga o‘raladi tong,
Ortidan nurlari arg‘imchoq solib.
Havoda o‘ynagan moviy tomchilar
Zaminning yuzidan bo‘salar olib.
Har gal ko‘k toqiga osilgan qamar
Sening muhabbating singari dog‘li.
Har gal shafaq uzra botayotgan quyosh
Mening yuragimga o‘xshagan qonli.
O’zbekiston Milliy universiteti falsafa fakulteti bakalavr va magistratura bosqichlarida tahsil olgan. “Ostona” va “Shoir xayollari” she’riy to’plamlari muallifi. Somerset Moem, S.A.Tolstaya, O.Genri, R.Agutagava ijodidan qilgan tarjimalari e’lon qilingan.