Sahifa yuklanmoqda . . .
Tovusday yaltiroq, ey go‘zal yirtqich!
Mana, ko‘ksimni yirt, mana, qonim — ich!
Ko‘yingda shamolday jismim sovrilgan,
Falakda yangi oy — mening qovurg‘am.
Adashgan qovurg‘am! Allatovur g‘am
Sensiz yuragimga qadalar dam-dam.
Dam-dam ko‘ksim tuman, dam-dam ko‘zim nam,
Kelmasang — o‘laman, kelsang — o‘laman.
Ko‘ksimga qo‘ydimmi, qovurg‘am — yirtqich...
Mayli, ko‘ksimni yirt, mayli, qonim ich!..
O’zbekiston xalq shoiri (2000). ToshDUning jurnalistika fakultetini tugatgan (1972). Ilk kitobi — «Insonni tushunish» (1979). «Holat» (1979), «Oqibat» (1980), «Ko‘zgu» (1983), «Surat parchalari» (1985), «Dars» (1985), «Ikkinchi aprel» (1987), «Baxshiyona» (1989), «G’aroyib ajdarho» (1990), «Uyg‘onish azobi» (1991), «G’ussa» (1994), «Uzun tun» (1994), «Saylanma» (1995), «Kuz» (2001) kabi she’riy va «Jodu» (2003) nasriy to‘plamlari nashr etilgan. Dramalar ham yozgan («Bir qadam yo‘l». 1997; «Alpomishning kaytishi», 1998 va boshqa).