Sahifa yuklanmoqda . . .
Sohilini qayraydi dengiz.
Tun-kun qayrar kimning qasdida?
Qorong‘u bu kechada sassiz
Kim o‘ynaydi uni dastida?
Sohilda jim tentigan ayol,
Qani sening sodiq hamrohing?
Nega qadam qo‘ymog‘ing malol,
Nega buncha titranar ohing?
Yonog‘ingda, sho‘r lablaringda
Vijirlaydi kechagi bo‘sa.
Xiyonatdan keyin odamzot —
Yashamasa — yo‘q bo‘lsa, o‘lsa...
Sohilini qayradi dengiz,
Tun-kun qayrar — kimning qasdida:
Ulkan bu tig‘, nahot, yarashar
Shu nozik ayolning dastiga?
O’zbekiston xalq shoiri (2000). ToshDUning jurnalistika fakultetini tugatgan (1972). Ilk kitobi — «Insonni tushunish» (1979). «Holat» (1979), «Oqibat» (1980), «Ko‘zgu» (1983), «Surat parchalari» (1985), «Dars» (1985), «Ikkinchi aprel» (1987), «Baxshiyona» (1989), «G’aroyib ajdarho» (1990), «Uyg‘onish azobi» (1991), «G’ussa» (1994), «Uzun tun» (1994), «Saylanma» (1995), «Kuz» (2001) kabi she’riy va «Jodu» (2003) nasriy to‘plamlari nashr etilgan. Dramalar ham yozgan («Bir qadam yo‘l». 1997; «Alpomishning kaytishi», 1998 va boshqa).