Shoir sevgisi

Tanimayman deysiz,

Bilmayman deysiz.

Yorijon, nozmi bu,

Sho’xliklaringiz?..

Meni tanir hatto,

Kipriklaringiz,

Siz esa shoirni

Sevmayman deysiz.

Ko’rib-ko’rmaslikka

Olmoqlar oson.

Siz-ku ko’rsangiz ham

Olmaysizu tan,

Meni tanib, hatto

Har kun ko’chamdan,

Sochingiz qo’l silkib

O’tar yorijon.

Bilaman taxminan

Shunday o’ylaysiz:

Shoirlar – devona,

Tuzalmaydilar.

Shoirning sevgisi

O’tkinchi deysiz,

Shoirlar odamdek

Sevolmaydilar.

Yona-yona bir kun

Ko’yingizda men,

Ado bo’ladirg’on

Qulga o’xshayman.

Eng go’zal she’rimni

To’yingizda men,

Poyingizga gulxan

Qilib to’shayman.

Qo’rqmang. Yangrar qo’shiq.

Tugamas o’yin.

Ko’rganlar sizdan ko’z

Uzolmaydilar.

Shoirlar buzolmas

Birovning to’yin,

Birovning uyini

Buzolmaydilar.