Sahifa yuklanmoqda . . .
Sen uxlayapsan.
derazadan tushgan oy nuri
sudralib-sudralib
ko‘rpangga yetar.
Dunyodagi Eng Go‘zal Ayol,
oyning nurlariga o‘ranib uxla,
oyning nurlarini quchoqlab uxla,
meni sog‘ingan lablaringni
oyning lablariga bosib uxlagin...
Men bora olmayman. Yurak to‘la tosh.
Ayt, qachon vaznsiz bo‘lmoqlik mumkin?
Qanday oy nuriga aylansa bo‘lar
va qachon oy nuriday sarg‘aygan qo‘llarim
qaro sochlaringni silab titragay?
Dunyodagi Eng Go‘zal Ayol,
nahot, bir umr kerak bo‘lsa,
oy nuriga aylanmoq uchun?..
O’zbekiston xalq shoiri (2000). ToshDUning jurnalistika fakultetini tugatgan (1972). Ilk kitobi — «Insonni tushunish» (1979). «Holat» (1979), «Oqibat» (1980), «Ko‘zgu» (1983), «Surat parchalari» (1985), «Dars» (1985), «Ikkinchi aprel» (1987), «Baxshiyona» (1989), «G’aroyib ajdarho» (1990), «Uyg‘onish azobi» (1991), «G’ussa» (1994), «Uzun tun» (1994), «Saylanma» (1995), «Kuz» (2001) kabi she’riy va «Jodu» (2003) nasriy to‘plamlari nashr etilgan. Dramalar ham yozgan («Bir qadam yo‘l». 1997; «Alpomishning kaytishi», 1998 va boshqa).