Sahifa yuklanmoqda . . .
Bu yerda faqat tun. Faqat tun. Tun. Tun... Azobi — qabrga borishdan uzun. Qahraton muallim beradi ta’lim — "Stalin bilmaydi, o‘rtoq Stalin"... Kuzdan bahorgacha Tayga zim-ziyo. Muzlab o‘lmadingmi, O‘rta Osiyo? Qalbing-ku qamaldi, yitdi, otildi, Kimlar ig‘vo yozdi, kimlar sotildi. — To‘xtagin, otaman! — hayqirar nozir... "Stalin bilmaydi, bilsaydi hozir..." Kimga keraksan, ey sabil qolgan jon? Bir balo bo‘ladi! Qaynayapti qon. Tikan sim! Nimasan? Kimsan o‘zi? Kim? Badanni tikaning tiladi sim-sim... Boshimga engashar yoshgina soqchi... — Soqchi, o‘lmadimmi, ko‘zimga boq-chi!... Toshkentda bir ayol pichirlar g‘amgin: — Stalin!... Bilmaydi o‘rtoq Stalin...
O’zbekiston xalq shoiri (2000). ToshDUning jurnalistika fakultetini tugatgan (1972). Ilk kitobi — «Insonni tushunish» (1979). «Holat» (1979), «Oqibat» (1980), «Ko‘zgu» (1983), «Surat parchalari» (1985), «Dars» (1985), «Ikkinchi aprel» (1987), «Baxshiyona» (1989), «G’aroyib ajdarho» (1990), «Uyg‘onish azobi» (1991), «G’ussa» (1994), «Uzun tun» (1994), «Saylanma» (1995), «Kuz» (2001) kabi she’riy va «Jodu» (2003) nasriy to‘plamlari nashr etilgan. Dramalar ham yozgan («Bir qadam yo‘l». 1997; «Alpomishning kaytishi», 1998 va boshqa).