Sahifa yuklanmoqda . . .
Nimadandir bo‘lib bezovta,
Itlar hurib qoldi nogahon.
Kimdir kezar chorbog‘da, ana...
Shitir-shitir etmoqda xazon.
Yog‘a boshlar yomg‘ir imillab,
Kuzgi bog‘lar bag‘ri tumanzor.
U jim turar nimadir tilab,
Derazamga boqib umidvor.
Ishqu nafrat o‘rtasidaman...
Izlagancha qalbimdan shafqat,
Unga g‘amgan boqib turibman,
Kel, demoqqa topolmay jur’at.
U ketadi beumid, ma’yus,
Quchog‘iga oladi tuman...
Ko‘z yummayman tong otguncha yuz,
Itlar yana hurisharmikan?..
O’zbekiston xalq shoiri (2000). ToshDUning jurnalistika fakultetini tugatgan (1972). Ilk kitobi — «Insonni tushunish» (1979). «Holat» (1979), «Oqibat» (1980), «Ko‘zgu» (1983), «Surat parchalari» (1985), «Dars» (1985), «Ikkinchi aprel» (1987), «Baxshiyona» (1989), «G’aroyib ajdarho» (1990), «Uyg‘onish azobi» (1991), «G’ussa» (1994), «Uzun tun» (1994), «Saylanma» (1995), «Kuz» (2001) kabi she’riy va «Jodu» (2003) nasriy to‘plamlari nashr etilgan. Dramalar ham yozgan («Bir qadam yo‘l». 1997; «Alpomishning kaytishi», 1998 va boshqa).