Munojot

Qulab tushmas tom uchun shukur,

Kunduz uchun, shom uchun shukur,

Bir kun to‘lar jom uchun shukur,

Tangrim, kechir, gunohlarim bor.

Yashnarmidim mehring bo‘lmasa,

Sir topmasdim sehring bo‘lmasa,

Qo‘l urmadim muhring bo‘lmasa,

Parilardan guvohlarim bor.

Aytding: “Suvdek poyimda oqqil,

Olov bo‘lib suvlarni yoqqil”.

Ko‘zim, ko‘nglim, ruhimga boqqil,

Sendan har dam ogohlarim bor.

Najot bormi isming aytmasam,

Sendan kelib, senga qaytmasam,

Qasam, qasam, o‘zingga qasam,

Senga aytar dil ohlarim bor.

Har qadamda xatolar qildim,

Sen shunda ham atolar qilding,

Har tong, har tun angladim, bilding,

Tushib chiqar jar-chohlarim bor.

Ne naf mudom alam chekmoqdin,

Dil sindirib, daraxt ekmoqdin,

Bir zum tinmam seni sevmoqdin,

Ko‘ksimda ishq buloqlarim bor.

Tangrim, kechir, gunohlarim bor.