Sahifa yuklanmoqda . . .
1
QISH
U payt palto kiymas edi qish,
Qo‘lqopi yo‘q edi qo‘lida,
Qish — yamoqli, ardoqli kalish —
Oyoq qo‘ysang — qorga ko‘milar.
Yayramasdi issiq uylarda
Izg‘irinning uvvosin tinglab.
Qish — mol boqib muzlagan bola —
Darvozadan kiradi titrab.
Qish kezmasdi dil ochar mahal
Ko‘chalarda burqsitib nafas.
Qish — dahlizda jon saqlar sandal,
Qish — pechkali uylarga havas.
U payt kitob o‘qir edi qish —
Hayajondan titrab tovushi.
Qish — zindondan chiqqan Alpomish,
Qish — Barchinning siniq nolishi.
Qish — ertakning haroratida
Qalb ostida erigan toshlar.
Qish — orzuning sharor zabtidan
Kitoblarga to‘kilgan yoshlar.
2
YOZ
Oftob g‘olib keldi — muqarrar —
Kiyimini yechmasin qancha,
Termizdan to Toshkentga qadar
Yoz yiqildi shundoq chalqancha.
Turonning sha’n kengliklarida
Gulu maysa lahzada — xazon.
Hayot — tog‘lar qo‘ltiqlarida,
Ariqlarning bo‘ynidadir jon.
Lohaslanib mudradi kunduz
Gujumlarning soyalarida.
Irmoqlanib o‘zin otdi muz
Boysuntog‘ning qoyalaridan.
Shahar tomon jo‘nadi bola —
Qo‘llarida eski jomadon.
Jomadonda bir parcha dala,
Uch-to‘rt kitob, ikki kulcha non.
Hovuzlarning tor o‘lkasida
Qurbaqalar kechasi hofiz.
Boshin qo‘yib yoz yelkasiga,
Kuyib-kuyib yig‘ladi bir qiz.
O’zbekiston xalq shoiri (2000). ToshDUning jurnalistika fakultetini tugatgan (1972). Ilk kitobi — «Insonni tushunish» (1979). «Holat» (1979), «Oqibat» (1980), «Ko‘zgu» (1983), «Surat parchalari» (1985), «Dars» (1985), «Ikkinchi aprel» (1987), «Baxshiyona» (1989), «G’aroyib ajdarho» (1990), «Uyg‘onish azobi» (1991), «G’ussa» (1994), «Uzun tun» (1994), «Saylanma» (1995), «Kuz» (2001) kabi she’riy va «Jodu» (2003) nasriy to‘plamlari nashr etilgan. Dramalar ham yozgan («Bir qadam yo‘l». 1997; «Alpomishning kaytishi», 1998 va boshqa).