Sahifa yuklanmoqda . . .
Ot jonsarak yer tepinar,
Uzar tizginni.
Tentak shamol olib kelar
Jondor isini.
Qaro tunda lovullaydi
Bo‘rining ko‘zi.
Qichqiraru shamol jarga
Tashlaydi o‘zin.
Chaqmoq! Yomg‘ir uriladi
Qoya betiga.
Qo‘ylar hurkib g‘uj bo‘ladi
Qo‘ton chetiga.
Emaklaydi bo‘ri jimjit,
O‘ljaga intiq.
Tunga qarab itlar hurar...
Qarsillar miltiq!
O‘tovda tun. Cho‘pon o‘rnin
Topar paypaslab.
O‘g‘ilchasi kirar titrab
O‘rniga asta...
Kecha — uzun. Kecha — cheksiz.
Kecha — g‘alayon.
Xavotirda farzandini
Quchoqlar cho‘pon!
U to‘lg‘onar tishlariga
Tishlab nolasin...
Shamol yig‘lar — yetim qolgan
Bo‘ri bolasi...
O’zbekiston xalq shoiri (2000). ToshDUning jurnalistika fakultetini tugatgan (1972). Ilk kitobi — «Insonni tushunish» (1979). «Holat» (1979), «Oqibat» (1980), «Ko‘zgu» (1983), «Surat parchalari» (1985), «Dars» (1985), «Ikkinchi aprel» (1987), «Baxshiyona» (1989), «G’aroyib ajdarho» (1990), «Uyg‘onish azobi» (1991), «G’ussa» (1994), «Uzun tun» (1994), «Saylanma» (1995), «Kuz» (2001) kabi she’riy va «Jodu» (2003) nasriy to‘plamlari nashr etilgan. Dramalar ham yozgan («Bir qadam yo‘l». 1997; «Alpomishning kaytishi», 1998 va boshqa).